«Каб адрамантаваць пад’езд, давялося прайсці цэлы квэст». Мінчанка распавяла, як дамагалася рамонту праз ЖКГ

Жыхарка Мінска падзялілася ў Threads гісторыяй, як ёй давялося дамагацца капітальнага рамонту ад ЖКГ. Паводле яе словаў, нават рамонт пад’езда, які фінансуецца самімі ўласнікамі кватэр, не адбываецца аўтаматычна. Каб дамагчыся пачатку работ, ёй давялося доўгі час звяртацца ў розныя дзяржаўныя органы.

Чытайце таксама: Віцебчукі паскардзіліся, што пасля капрамонту дом стаў выглядаць горш, а ў падвале з’явіліся мышы

«Рамонт пад’ездаў за кошт уласнікаў у Мінску ўжо даўно. Але каб дамагчыся яго правядзення, трэба прайсці цэлы квэст. Пісаць бясконцыя электронныя звароты ў ЖКГ, мясцовыя адміністрацыі, ажно да Адміністрацыі прэзідэнта. Таму што проста так да вас не прыйдуць і нічога не зробяць. Нават за ваш кошт», — напісала жанчына.

Яна адзначыла, што такім чынам змагла дамагчыся рамонту адразу ў двух пад’ездах — у Першамайскім і Савецкім раёнах Мінска.

«Потам і крывёю дасталіся мне два рамонты пад’ездаў. Цяпер нарэшце можна заходзіць не ў бруд, а ў больш-менш прыстойны пад’езд (на фоне таго, што было)», — дадала яна.

Да паведамлення яна прыклала фатаграфіі, на якіх бачна, у якім стане знаходзіўся пад’езд да рамонту: на здымках можна заўважыць аблезлую фарбу, пашкоджаную тынкоўку, іржавыя дзверы і шматгадовыя сляды эксплуатацыі.

У каментарыях узніклі пытанні пра кошт рамонту

Адзін з карыстальнікаў звярнуў увагу, што рамонт праз ЖКГ абыходзіцца значна даражэй.

• «Там такі кошт выстаўляе ЖЭС — проста жах. Калі наймаць рабочых самастойна, будзе прыкладна ўдвая танней».

Аднак аўтарка паста адказала, што самастойна арганізаваць рамонт у шматкватэрным доме значна складаней.

• «Калі наймаць самім, няма гарантыі, што атрымаецца падзяліць суму паміж усімі кватэрамі. Абавязкова будуць тыя, хто адмовіцца. А праз ЖКГ яны разбіваюць плацёж на тры месяцы і ўключаюць яго ў жыроўкі кожнаму. Хочаш ці не — заплаціш».

Паводле мінчанкі, у доме ў Першамайскім раёне, дзе ўсяго 16 кватэр, многія жыхары — пенсіянеры або ўласнікі, якія здаюць жыллё ў арэнду:

«Пенсіянерам дорага, а тым, хто здае кватэры, увогуле было ўсё адно. Яны ж там не жывуць і не бачаць гэтых сцен кожны дзень».

Як, паводле мінчанкі, удалося абысці неабходнасць згоды ўсіх суседзяў

Жанчына сцвярджае, што галоўнай задачай было дамагчыся, каб ЖКГ прызнала неабходнасць работ.

• «Самае галоўнае — сваімі зваротамі зрабіць так, каб ЖКГ прызнала рамонт планавым. Тады ўжо не патрэбна ні ад каго атрымліваць згоду. У нас адна суседка бегала са скаргамі, што ёй дорага. Але ў ЖКГ ёй адказалі, што рамонт будзе праведзены».

Як гэта працуе паводле заканадаўства

У Беларусі рамонт пад’ездаў сапраўды выконваецца за кошт уласнікаў жылых памяшканняў. Гэта прадугледжана пастановай ад Міністэрства жыллёва-камунальнай гаспадаркі Арганізацыя ЖКГ выступае заказчыкам работ, а іх кошт размяркоўваецца паміж уласнікамі кватэр і, як правіла, уключаецца ў плацяжы за жыллё на працягу некалькіх месяцаў.

Разам з тым рашэнне аб правядзенні рамонту прымаецца эксплуатуючай арганізацыяй пасля абследавання стану пад’езда. Менавіта таму, як сцвярджае аўтарка гісторыі, без шматлікіх зваротаў і настойлівасці дамагчыся ўключэння дома ў план рамонтаў аказалася няпроста.

Чытайце таксама: «Сцяг змянілі за гадзіны, а рамонт — не»: мінчанка зноў скардзіцца на дом пасля капрамонту

Будь на связи и в безопасности: подключи BGlobal VPN

Наш канал в Telegram. Присоединяйтесь!

Есть о чем рассказать? Пишите в наш Telegram-бот. Это анонимно и быстро